Igrexa de Santa María de Igrexafeita

Un dos templos máis espectaculares de San Sadurniño é o de Igrexafeita, ergueito na honra de Nosa Señora do Biscordel que, segundo a tradición, tería aparecido nun manancial situado a escasos metros da igrexa. Non se parece a ningunha das outras construcións relixiosas do municipio, quizais polo seu campanario -que dobra a altura do corpo principal- ou quizais porque a pedra exterior está á vista. É de estilo gótico cunha nave central, sancristía no muro norte e unha capela no do sur. A igrexa sufriu numerosas modificacións, a máis recente do 1903, cando se lle fixo o campanario. Porén, que é gótica sábese ben mirando o altar maior.

Desde o século XVIII tivo un retablo que se retirou a comezos deste século por causa do seu mal estado para colocalo na capela lateral. Os traballos deixaron ao descuberto riquísimas pinturas murais nun excelente estado de conservación que cobren toda a parede prolongándose incluso por entre os nervios da bóveda de cruzaría.

As investigacións efectuadas durante a restauración dos frescos revelaron que foron executados en distintas épocas entre os séculos XI e XIV. As imaxes representan escenas da Anunciación e da Asunción da virxe María con debuxos vermellos e ocres de grande detalle. A representación de Deus Pai preside a composición que se completa con anxos trompeteiros, a pomba e un grupo de apóstolos. No deseño introdúcese unha rudimentaria perspectiva pouco habitual na arte daquel tempo. Hai probas de que en Naraío tamén existen murais semellantes que poderían ser da mesma autoría debido á similitude dos trazos.